اليوم بسوي ريفيو عن مجموعة المكاديميا للشعر
أنا إشتريت السيت كامل عشان أجربه
وصارلي أستخدمه يمكن ٥ شهور تقريبا
أستخدم معاها أشياء ثانية مو كل يوم أستخدمها
الصورة صورتها من أول ماإشتريت السيت
أنا نوع شعري كيرلي ناعم بس صار جاف ومتضرر من الصبغات
ومرررة frizzy :(
سعر المجموعة كاملة بـ ٥٠٠ ريال من النزيه ومادري عن سعر كل منتج لوحده
السيت جا معاها مشط اللي أسنانه عريضة ماأستخدمه نهائيا
وإشتريت فرشة راح أوريكم صورتها سعرها ٣٨ ريال تقريبا
ببدا بـ زيت الشعر
Healing Oil Treatment
ريحته زيت الأرغان مرة أحبها الريحة
صراحة الزيت يستاهل كل ريال أول ماأحطه ينعم شعري بشكل ملحوظ ويخفف الـ frizz
أستخدمه بعد الشاور أحط تقريبا ضغطتين على كل الشعر وأمشط بالفرشة حقة المكاديميا
ينفع للي شعرهم جاف ومتضرر ودايما يصبغون :|
وممكن لمن تصبغين شعرك تحطي ضغطة منه مع خليط الصبغة ،، جربتها
وحسيت الصبغة مانشفت شعري زي دايما
شعري مرررة تحسن من بعد إستخدامه وراح أشتريه مرة ثانية أعطيه ١٠/١٠
بخاخ الشعر
Healing oil spray
هذا نفس الزيت المعالج بس مخفف ينفع للي شعرهم دهني
وقريت ريفيوز بنات شعرهم دهني ناسبهم أكثر
أنا أستخدمه لمن بصفف شعري لأنه الزيت ثقيل شويه فأستخدم البخاخ
ويبين الشعر صحي ويخفف النفشة ويعطيه لمعة حلوة
عن نفسي ماراح أشتريه مرة ثانية لأنه شعري جاف
وأحس في التصفيف ممكن أستخدم برودكت ثاني وأنصح فيه للبنات اللي شعرهم دهني
الشامبو
Rejuvenating Shampoo
أنا بصراحة أول مرة أشتري شامبو مو درق ستور
وحسيت بفرق كبييييير مرة مستحيل أرجع أستخدم شامبوهات عادية من بعد ماجربت المكاديميا لوول
الشامبو خالي من السلوفيت والبارابين
ريحته تجنن نفسي بعطر يكون نفس الريحة لووول
المهم عندي إنو يكون خالي من السولفيت لأن السولفيت ينشف الشعر وخصوصا الكيرلي يخليه فريزي بزيادة
وعادة الشامبوهات الخالية من السلوفيت تكون ماتنظف زين بس بالعكس شامبو المكاديميا ينظف من قلب
وشعري يجلس ٣ أيام نظيف وريحته حلوة
وحلو فيه إنه ينعم الشعر تحسين ماتحتاجين بلسم بعده
راح أشتريه مرة ثانية ومليون مرة أعطيه ١٠/١٠
البلسم
Moisturizing Rinse
إحساسي للبلسم نفس البخاخ لول
أحسه ماينفع لشعري وترطيبه مو كفاية ويناسب الشعر الدهني أكثر
ريحته مرررة حلوة برضو
بس عن نفسي ماراح أشتريه مرة ثانية وراح أكتفي بالماسك
الماسك
Deep Repair Masque
لو بختار شيء واحد من المجموعة أنصحكم فيه راح أختار الماسك ❤.❤
ترطيبه من أروع الماسكات اللي جربتها وثقيل مرة
ونتيجته تبين من أول مرة تستخدمينه ،، طريقتي بكل ماسك بعد ما أغسل شعري بالشامبو
أنشفه شويه بالمنشفة وأحط الماسك على كل الشعر وألبس الشاور كاب وأخليه ربع ساعة وأغسله
شعري يبين صحي ويلمع ،، جربت مرة تريتمينت بصالون بـ ١٥٠٠
وبكل صراحة ماسك المكاديما أعطاني نفس النتيجة
ريحته مررة أحبها كل المجموعة ريحتها مررة حلوة
وأنا أهم شيء عندي في منتجات الشعر تكون ريحتها حلوة
راح أشتريه مرة ثانية وماراح أشتري ماسك غيره لول أعطيه مليون من ١٠
الكريم
Nourishing Leave-In cream
كريم مرطب للشعر بعد الشاور
بما إنه شعري كيرلي لمن أخليه على طبيعته أحب أستخدم الكريم هذا
وبصراحة أكثر شيء أحبها بهذا الكريم ريحته
جايه على كيوي أو بابايا لوول ماني عارفة بالزبط بس ريحة فواكه
لو بشتريه مرة ثانية بس عشان ريحته
ولا نتيجته عادية ممكن أي ليف إن يؤدي الغرض
الفرشة
No Tangle Styler Brush
تفكك تشابك الشعر بدون ماتقطعه
أنا عقدتي أمشط شعري بس هذه حلو إستخدامها ومايعور لووول
تستخدم والشعر مبلول أو جاف
تعيش وقت طويل بس لو هريتها راح أشتري وحدة ثانية لوول
Healing Oil Infused Comb
هذا المشط اللي جا مع السيت هوا يستخدم مع الزيت المعالج عشان يوزعه عالشعر
بس أنا ماأستخدمه أحب الفرشة أكثر
وبس إن شالله اعجبكم
ليست هناك تعليقات:
إرسال تعليق